- Arabako arte-ondarea hiltzeko zorian egon da Zirianon, Gasteiztik oso gertu, eta orain arte inork ez du horri buruz ezer aipatu, ezta zaintzeko apusturik egin ere.
- Zirianoko eliza erortzear egon da, erabat ahaztuta. Orain dela lau urte “Arabako Pintzeladurak Interpretatzeko Zentroa” bihurtzekotan egon ziren, baina asmoa bertan behera geratu zen instituzioek proiektuan sinetsi ez zutelako. Beste behin ere, aukera historikoa alferrik galdua.
- Elizarekin batera betiko galduko genituzkeen bere gangetako XVI. mendeko margolan baliotsuak. Pintzeladura horiek Arabako Artearen Historiako liburu nagusienetarikoaren azala osatzen dute: Gasteizko Elizbarrutiko Monumentuen Katalogoaren 8. liburukiarena, hain zuzen ere.
- Pintzeladura, hau da, elizetan pintzelez egindako tenepera-pintura, arabarrok Errenazimentuari egindako ekarpenik esanguratsuena izan liteke. Garai hartan elizak pintzelatzen zituzten maisuek gure mugetatik kanpo ere ospe handia izan zuten. Hori, zalantzarik gabe, gaur egun harro sentitzeko modukoa da.
- Jo www.sos-ziriano.org web gunera, edo Facebook-eko kidea bazara, egin zaitez gure jarraitzaile. Erakuts diezaiegun instituzioei, arabarrok gure ondarea eta sustraiak zaintzeari garrantzitsua deritzogula!